سلسلة ” شاعر وقصيدة ”
إعداد وتقديم: ذة أمنة برواضي.
الهدف منها التعريف بشعراء مغاربة، وتسليط الضوء على مسيرتهم الإبداعية، وتقديم نموذج من شعرهم للقارئ.
الحلقة 58 مع الشاعرة: مليكة فتح الإسلام
الشاعرة مليكة فتح الإسلام
من مواليد سنة 1985 بأولاد إملول نواحي سيدي بوعثمان
الإقامة : مدينة اليوسفية
حاصلة على الإجازة في القانون الخاص بكلية العلوم القانونية والاقتصادية القاضي عياض بمراكش
_دبلوم تقني في كتابة المكتبيات بمعهد التكنولوجيا التطبيقية باليوسفية
_نائبة رئيس المرصد المغربي الجهوي لحقوق الإنسان ومكافحة الفساد وحماية المال العام
صدر لها ديوان موسوم بِ( غْزِيلْ لكْلامْ) سنة 2014
القصيدة:
فرق كبير بين كلمة أيّه
وبين كلمة لاَّ
بين واحد غادي معاك بالصَّدق
وواحد إتخلَّى
فرق كبير بين هاد لَمْحلَّة
وديك لمحلَّة
بين بزَّاااااف الرجال
وبينك أ عبد الله
فرق كبير
فرق كبير بين ماء
جاي في قادوس مصدِّي
وبين مَّيْهَة لبير
بين لسان دوَّاي …
ولسان غِ خانو التَّعبير
بين شربة من عوينة صااااافية
وبين تطسينة ف غدير
فرق كبير
فرق كبير بين وﯖفة ووﯖفة
بين تْبَنْضِيضة وعَطْية ﯖفَا
بين واحد يبكي لدموعك
وآخُر فرحان لعْرَاك
فرحان لجوعك
بين واحد يتمنَّى جْلاك
وآخُر يتسنَّى رجوعك
فرق كبير
فرق كبير بينك أ عبد الله
وبين بزَّاااف من شلَّى
من شلَّى گْنُوس
هيَّ بْقَات ف بُوسَان الرُّوسْ
ولاَّ شحال فجيبك دْلفلوس
الرُّجلة عندي أ عبد الله
الرجلة عندي أ عبد الله
ماشي حُلَّة …
الرُّجلة حاااال
حال ما لـﯖيتوش ..
ف شْعَيبة …
ولا العربي …
ولا الزَّهواني
هيَّ سميَّات جابتها الوقت
وكْتبتها ف ديواني
لكن ما كتْبتنيش كيف كتبتيني
ونبَّتي حُب بوري ف فدَّاني
ما طمعتيش تكون قصيدة
يردَّدْها لساني
ما بغيتيش تكون برَيَّة
وتقصد عنواني
كُنتِ خايف لا تكون وردة
مجرَّد وردة ف جناني
ونسيتي باللِّي فرق كبير
فرق كبير بين ..
باللَّعمان والكركاز
الـﯖحوان …
الجَّمرة والغنباز
والورد البلدي دااااك الحُرّْ
ما بغيتيش تكون بحر
نعُومك ساعة تهدا مواجك
ما بغيتيش تكون مَحْرك
قصايدي خيل ..وآنا عجاجك
ما قبلتيش تكون جبال
ونتيه ففجاجك
ما رضَيْتيش تكون حبل
تربطني بيك …
تعـﯖد فيَّا وتفتل
خفتي يا عبد الله
خفتي نجيك طايعة
خفتي نقبل…
خفتي تهواني ما تقدر تنساني
خفتي توحل
خفتي يا عبد الله وما قبلتيش
ما قبلتيش نغير منَّك عليك
سْحَااااااااااكْ
نحُوزك ليَّا ﯖبل لا تحوزني ليك