اتْخَايِلْ مْعَايَا
كُونْ كَانَتْ…
الأَرْضْ الْفُوقْ
وَالسّْمَا(ء) لْتَحْتْ
فِينْ غَانْكُونُو احْنَايَا ؟! ،
وَاشْ الْفُوقْ
وَاشْ لْتَحْتْ
وَلَّا امْوَاسْطِينْ بِينَاتْهُمْ ؟!،
اتْخَايِلْ مْعَايَا
وْشُوفْ غِيرْ مَرَّة
وَاشْ تَقْدَرْ…
تَحْسَبْ امْوَاجْ الَبْحَرْ ؟
وَاشْ تَقْدَرْ…
تَحْسَبْ حَبَّاتْ الرّْمَلْ ؟
وَلَّا غِيرْ…
اشْحَالْ مَنْ شَجْرَة ؟،
اتْخَايِلْ مْعَايَا
كُونْ كَنَّا…
سْحَابْ وَلَّا نْجُومْ
وَاشْ انْغِيرُو
وَلَّا نْحَسْدُو بَعْضِيَاتْنَا ؟!
مُحَالْ…
مُحَالْ عْلَى حْسَابْ فْهَامْتِي
وَعْلَى قَدّْ نِيّْتَكْ
احْجَارْ الْعَافِيَة يْشَدُّوكْ ،
اللهْ يِسْمَحْ لَلْحَقِيقَة
اللِّي مَسْحُوهَا بْلِيگَة
وْكَتْبُوا بْخَطّْ اعْرِيضْ
الْكَذَّابْ يِدِّي لَاجَرْ ،
وَاتْخَايِلْ مْعَايَا
كُونْ كَنَّا نْعِيشُو
الْيُومَا بَعْقَلْ غَدَّا
وْمَصِيرْ الْمُسْتَقْبَلْ
نْشُوفُوهْ يُومْ الْوِلَادَة ،
آشْ مَنْ عْسَلْ
يْحَلِّي رِيقْ الشّْهَادَة
ايْلَا كَانْ…
مْرِيضْ الصّْبَرْ
حَالُو امْوَهَّنْ ؟،
وَشْحَالْ مَنْ لُونْ فَ الْحِيَاةْ
ؤُكِيفْ تْكُونْ اذْوَاقْهَا
ايْلَا كَانَتْ لَمْرَارَة غَالْبَة ؟،
مَا تَخْدَعْنِيشْ بَاللَّانَظَرِيَة
مَا تَخْدَعْنِيشْ…
بْجِيبْ أَفُمّْ ؤُگُولْ
حِيتْ كَايْنَة الْفَلْسَفَة
وْكَايْنَة الْهَلْوَسَة الْكَلَامِيَة ،
وَصْعِيبْ تَخْدَعْنِي
ايْلَا كَانْ إِيمَانِي اقْوِي
بْحَقِيقَةْ الْوُجُودْ ،
اتْخَايِلْ مْعَايَا
مَنْ هْنَا لْقُدَّامْ
الْبِتْرُولْ وَالْگَازْ
مَا يِبْقَى سَاوِي وَالُو
قُدَّامْ الْمَا(ء) وَالطَّاقَة ،
وَتْخَايِلْ مْعَايَا
تْنُوضْ ثَوْرَةْ الْجِيَّاعْ
عْلَى لُقْمَة
وَالْحُرُوبْ تَصْبَحْ
زِرَاعَة وَفْلَاحَة ،
هَاكْ لِيفَادَة
مَتْخُومَة فَايْدَة ،
هَاكْ الَكْلَامْ
اشْوِيَّة مَنْ شَلَّا ،
وْهَاكْ الَمْعَانِي
فَايْضَة شَلَّالْ ،
وَتْخَايِلْ مْعَايَا
كُونْ زَادُو الزَّجَلْ
مَادَّة فْ الَقْرَايَة .
بقلم : عبدو سلطان گاسمي