احميدة بلبالي
نردّف الفوضى
نخلِّي النظام
مسلسل خطواتك
نرحل ف كلامي
ف احلامي
ف هبالي
خارج زمانك نتعقل ….
هكذا قال الولد
اللي وجه لابسني،
سوّلني سؤال كبير
ف صغري
و بيه خوفني .
علاش الحب
قنطرة للمحال؟
علاش الصحرا
بكاها رمل
ولبحر
يبكي موجَه ورا موجَه؟
علاش الشجر
يبكي اوراقُه
وأنا نبكي تخمام
ف اشواقي
داير نظام
ونشكي فوضاه؟
عفاك …. عفاك
ديني معك
ف سهوتك،
على جناح خيالك
ردّفني
دخّلْ شوفك شوفي
رفيق نسرح معك
انا عشقي ماك
فين بغات حملاتك
ادِّيني
قبل نفيق
ويسلسلني نظامك ….
هذ النُّونْ
اللي كوّرتيه قدّامي
كيف ندير
نزيد ف لونُه كافي
يرد الكون كافي
ل اهبالي انا واياك ؟
“كن” غلطة لعمر
وها لخلاص
” كن ” شهوه
“كن ” رضاعه
“كن” كون
شون كوّرني فيه
نبرّد حرّ لوعَه
سكنتني
من يوم فطامي ….
كن دمعه
وطيح ف قنديل الليل
لا تقول شكون
ولا تسنى جواب.
هذ الجهَه
دهشَه
اكتشاف
زعامَه
غربَه بلا لسان
وسؤال،
برّاني أنا
وخا ما قالها لي حد.
ذيك الجيهَه
لمقابلَه لبحر
محبَّه واحزان.
رفيق
غاب ف غيابي،
حبيبَه
وحدانيَّه مع خيالي،
وكاس قهوه بلون آخر
غريب ف اشواقي
وخا ما قلتها لحد ….
ف حرب مع الزمان
امّي
عاشت برّانيه
جرَا صغرها على كبرها
حتى ضيعتهم
ضيعتهم بجوج
علمتني :
انا والزمان
مسلّمين
كيف الريح
هازنا الما,
عشت بلا صغر
وشدّيت ف الكبر
رجعت على آش درت
ضد لوصية :
“دير علاش ترجع”.
غدرْت الزمان
ما خلِّيت ليه
باش ينقي ايامُه
غير حيوط من لكلام
طامع نتوسدها
ليلة وحدانيتي
ونيس يشهد على غيابي
ايلا سهّل التاريخ……
“سير وخلي راسك معايا”
قلتِ
وزدتي ” عاود عمّر”
أنا…
شهوتي يمشي راسي
ويبقى خيالي هنا
نجدد لعمر
ونعمّر قلب.
الصوره مطلوبه ف الحدود
ووحشي
ما عرف حد خباله
لا ديواني
لا طيور
لا حد شم حراقُه.
خلّي الصوره لهيه
والباقي ليك
حتى نرجع ليه
ايلا بقينا ب العشق
او يفكرك
ايلا طال غيابي.
ياه …..
صغرك علّم كبري
سبحان ملقانا،
تلاقينا ف نص لفهامَه
ركلنا جهلنا
ف سلَّه
كمشنا اوراق لحزان
طلقنا لقلوب تصغار
على صفحات جديده
وكفات تميل
غير ب غمزه م لفراح.