ادريس الهكار
خليت اللول من ورايا
سبقتو ..
وجريتها جريات
مرة نوقف
نلهت لهتات
ومرات نعثر
فقشور الصدمات
ونقول أنا مالي
يميل حالي
أنا الخايف
الخايف من ذوك الجايات
واخة فمي يجري بالما
كتفت السكات
وسرطت لساني
العين تفرفر
و وذاني يسمعوه كلام غوات
ألغولات ، أيا لغوات
تلفتي بين السين والجيم
وضرك الراس
فين الطبيب ؟
فين الدوا والدويات ؟
يا داك المراية
ما تنسايش
مرة مرة توقفي وقفات
قالو لي عاود من لول
عاود السر يا مسكين
ياك أنت مول القصة
مول الطربوش والرزة
الجلابة و السلهام ..
والخيل تحنحن
تصهل فين بوحبة يا لمقدم
الشعير والتبن
ولا رخا على مسكين
تجمعت الحلقة يا ناسي
جمعت اللي هنا ولهيه
اللي قاري …
واللي ما قاريش
واللي مشى واللي ما غاديش
الضحك والبكا
فلخشام يتخباو معاني
معاني جيب بلا جيب
خاوي متقوب
شكون يجيب
الله يجيب يا مسكين
وما زال
مازال شحال من لول من ورايا
يجري ويجاري
ويجريها جريات