تجميع: مجدالدين سعودي/
1 وحده بياض الورقة تايقهرني.
2 ع البياض تانبني عالمي، لأنه من قلبه تايبدا طريقي لمستقبلي.
3 ف البياض بحث علي الحرف ينحث مني كاتب، واش نجح؟
الجواب عند بياض المستقبل
4 البياض سكات تايديني فين بغى. تايستفزني… تايهدهدني،
تايشتتني… تايجمعني، تايجمدني… تايذوبني، تايعريني منه…
تايكسيني به.
5 البياض تايفلسفني… تايصوفني… تايخلويني فيه.
6 م البياض يفيض ماء الحلمه حتى تايصير الحرف تايدي الحرف.
من قلب ماء البياض… على أديم تراب البياض تنبت ربيعة
الحياة الابداعية.
واش انتبهنا لوجودها؟ … واش ادركنا معناها.
فين الحرف اللي يجاوب أو اللي يقربنا م الجواب؟
7 ف أعماق البياض تايسكن النور. كيف الغوص له؟
ف آفاق البياض تايقبع المستقبل. كيف التحليق له؟
8 بالبياض تانواجه هلوسات الفناء وف البياض تانفتح بالخيال تجليات الخلود.
9 قبل ما نتمرغ ع البياض كانعوم جسدي ف لمداد.
10 ف أعماق البياض تانبحث على ألوهية الانسان، وف آفاق البياض تانبحث على ألوهية الحلم.
11 ف البياض كتبت الحياة وتغزلت بالجمال.
ف البياض خلقت حيوات نتحدى الموت.
ف البياض مددني المداد مدد… مدد.
12 نخلي البياض يقرا احلامي… يتنفس أملي… يعزف فرحي… يشعل مستقبلي. أنا حطيت قلبي وتخمامي عليه.
13 قدري سفر ف بياض لوراق مع ثورات البياض لبياض الكفن.
واش هو توحد؟ أو حلول؟
ياه على قدسية البياض.
مكتوب بلبيض… مغسول بلبيض. واش أصلي بياض، باش
نسكن البياض حتى نذوب ف البياض؟
14 احفرت ف عمق البياض على ماء الحلم، طلع لي بركان.
احفرت ف سحابة الظلام على شتيوة الضو، خرج لي إعصار.
15 خليوني نلبس هالة البياض ونمشي ف ظله، نكون فين بغيت معه
نكون.
خليوني نحقق انتمائي لمداد ف حياة إنسانية، يكبرني
ف طاعة محبه أبديه.
16 شحال ما تقدمت ف البياض وشحال ما تعمقت ف ضو
الحرف، نقول:
ما مشيت والو… ما عشت والو… ما شفت والو.
شحال ما تعلمت يبقى المحصول قليل ف والو.
17 بين شهوة البياض وشهية المداد
يتقطر الحرف لذة من قلب شهدة.
18 حرفي ماء وطين. حرفي نور ونار. حرفي ريح وريحان.
حرفي دم ومداد. حرفي ريق وترياق.
حرفي احتراق ع البياض.
19 الحرف نقطة عسل ف قلب البياض.
20 بين البياض والكاتب مداد عطشان للحقيقة والجمال.
21 الجمال جمال الحياة، جمال العقل، جمال الذكاء، جمال
الرؤيا، جمال حلم البياض.
خاتمة:
كانت الساعة وحدها ف برجها العاجي كاتراقب
اباها الزمن لا يضيع أمه الحياة.
هنا خليتها،
ومشيت ف الطريق اللبني للمستقبل نشوف آش تاينتظر
احلامي.
ادريس أمغار مسناوي
كناش5
بياض الطريق اللبني
تجميع مجدالدين سعودي
