حياني الله
حتى شفتو
نازل برجليه ..
وداخل براسو عريان
لسوق رب العالمين .
دَرْتْ فيها لامِينْ
وسرت نحاجي ليه ..
على منين داز
الشوك
لكرموس المسلمين .؟!!
نداخل عليه
بحليب لكرم ودواليه ..
علاش ..؟
كرم قبل الوقت
وساس ذوك لوراق المعلومين ..؟
مجمع الناس هذا
كلَّ شيخ
دار قبلة في جيه ..
لا حول ..
وفام الصلاة بالمظلومين .
لبس قشابة مفصلة
” دوريجين ”
وجات عليه ..
وتاتو
وكل ما خطب فينا
نقولو آمين .. !
يَتْهَجَّى في سوم البصلة
شكون يبرح به .. ؟
وهو باطي عليه
غ امتى يْطُّبْ
جيوب المحرومين .
آش هاذ الحصلة ..؟
العين بصيرة
ويْدِيهْ ..
قول قصيرة
جات تكحَّلْ لينا
وعمات العينين .. !
اللي قال المغرب خضر
يجي ويشوف
نهار توضر ليه ..
ساروت الرباح والخسارة
في ريش ام قنين .. !
ها زيدو
وما بقاش هضر
على غلَّةْ سْلاوِيهْ ..
هز يدو
وحتى من الكُسُورْ
زاد حسبو على الرعاوين .
جْرَى طْوَالِي
وْكَبَّلْ رباطي من فعلو
وكيسوَّلْ ..؟
اش طرا ليه ..
واش وصلت للعظم ..؟
اولى كَاع الجناوة حافيين ..؟ !!!
هاك
الدم نقاطي
ويلا ما كفاك
هاك
عرق كتافي شربيه ..
وخليني
نقول التسليم
لموالين القبة جاعرين .. !!!
شَرَّابِينْ
ما وجهي بلا حيا
والمخير فيهم
اش تسميه .. ؟
كاع من باع
وشرا
ورهن
سحور الصايمين .. !؟!!
هانت العشرة
واللي ما شرا
يخرج ، يتفرج
في دموع المساكين .
هازين كفوفهم للسما
شرعو دفوفهم
في وجه اللي ما يتسمى
وقالو كاملين :
” بدل ما تعطيونا الكَفة في يدينا .. علمونا كيفاش ما تبقاش مكَلوبة علينا “