إهداء إلى الزجال المبدع: إدريس مسناوي
لهيـــه
لهيــــــــــــــه
فذيك النقطة
لبعيده
لمرميه
لمجليه
لهيـــــه
فذيك الخاله
النابته فوجه الكون
ف الثلث الخالي
بين كراكر لحجر
بين مشامم الخزامى
وعواد الزهر
ف بلاد الشيح والريح
فين عاطيه ريحة الكون
وريحة لولادة
لمعشبه بعشوب الموت
كافور
كتاب
وكتان فلون الثلج
لهيــــــــه
أبعد منك … ومني
لهيه
فذيك السما
المتاومة بشمس وكمرة
تمة كان الخلق
وتمة كنت أنا … وياك
عجينة
نايضة م الأرض
تراب أحمر
مرجة زركة
جوج طيور
عجاج لكون
وما لحياة
دوى فينا صوت
داخل فالدواخل
صوت ينين
يمكن صوتك
يمكن صوتي
حنيـــــــن
سمعتك ……………
……….. شفتيني
تطلينا بالحمري
طاحت الشتا
جا الربيع
فيه أحنا
عشبة …… أنا
وعشبة ……….. أنت
شحال خصنا من عام
لولادة وحدة؟
آجي ناكلو فاكية الوقت
ونسرط ولسون الطريق
ولدني ولا نولدك؟
تكون ولادة وحدة
وجعة مشروكة
على سرير الروح
يطيح تيلادنا
يبدا ميلادنا
كون أنت الروح
ونكون أنا
الكسدة
كون أنت الكسدة
ونكون أنا الروح
ما يهمش
م نكونوش بحال الكاينين
م نمشيوش مع الغاديين
م ترجعناش طريق الجايين
خلي كونهم ليهم
خلي ريحهم تسوط عليهم
هـــــــاك … مد يديك
أنت مني … خوذ مني
كون
لون
بحر
عمر
نجوم
شموس
وقمار
خوذ مني
جنة بعيون حمرا
زاهية
باهية
خوذ شبر من مقبرة
ندفنو كل خطوة
كانت خسارة
كل كلمة كانت مرارة
نزرعو شجرة الدفلى
وتحت ظلها
نكولو كلام الراس والعين
يطرطق فينا ما
وضو قديم
فاعماق عماق الكون كان
وف مراية الذات
يضرب بشعاه
وعلى مثل طريقو
يرجع
يهتهت بينا
لهيه …
لدوك الكاينين
فداك الكون
لهيـــــــــــــــــــــــه
نهاد ابن عكيدة