ٱه امي ،،،
شحال سگيتي من يامك
ف بِيرْ الهم
وشحال عجنتي من دموعك
خُبز جوعي قْبَل مايتم
وشحال سرحتي نعاسك
قبل مانجوم
تطوي ليلها ويسالي الحلم
وٱش بقى من شحال
وانا فيك ايَّامي
حصادها اوقات
وعَوْلْتها بياض مخنٌَث
ف شعر الراس
منَقٌِ مزرار عمرو بالغربال.
ولٌِكَذٌَب طْوال ليام
على وجهها شوفني
خيوط راسما ف عيني
صورتها أميرة
ف نبض قلبي كاتحكم .
ٱه امي،،،عايشة
فين لقاك في ،وفين نصيب
شقاوتي فيك؟
وفين نخليني فيك ذاك الحابي
مل شعبط ف جلايلك
وسندتيه على صدر من خشب وقاقفو
حليب رابي
فين نسمعني فيك بكايا
ونحلف حتى نخبي العين
الضاسرة ل تَفْشي ليك
سر الدمعة
ونشوف ف عينك كحالي
سابگ الما ف بردو خابي.
ٱه امي ،،،عايشة
ما حسيت بغدر الزمان
حتى غدرني
واطوى يامي وطيح شبابي
مل كان ليه شان
دابا شفتك بعينيك
وحسيتك بالشوفة منك
مل تعبر الفرحة
شبر منها يا حسن تكفيك،
ٱه امي ،،،،
كون كان العمر يتبدل
كون بدلت عمري فيك
ومن ما وادي يسقيك
وكون كان العمر يتلف على طريقو
كون خبيت عمر مي بين ضلوعي
وخليت يامي الجافلة تراضيك،
ٱه امي ،،،،ٱه امي
راه لساني بعد التسبيح
بيك وعليك يسول فيك……
حسن بوسلام. المغرب